周潤發的母親陳麗芳上月13日於家中睡夢中逝世，享年98歲。昨日周家在沙田寶福山設靈，今早以日本佛教主要宗派之日蓮正宗儀式舉行大殮，遺體隨即移往歌連臣角火化，骨灰將安放在家鄉南丫島。由於發哥一向做事低調，再加上在武漢肺炎疫情下，發媽的喪禮進行得十分低調和簡單，只邀請了至親出席，完全沒有影視圈中好友收到通知。

今日《蘋果》收到消息後向發嫂求證，發嫂證實發媽今日已經火化：「最近真係有好多唔開心嘅事發生，奶奶上月13號過身，我最細叔仔（7叔）19號喺新加坡心臟病發過咗身，今年70歲。」問到發媽死於甚麼病？發嫂表示：「其實都係老人病，成100歲啦！近年病痛多咗，我同發哥都有心理準備啦！係笑喪，發哥心情好平靜，奶奶係食完晚飯入房睡一下，工人入房睇佢，見冇反應先通知我哋，佢走得好安詳，都係一種福氣！」

生前發媽曾經叮囑發哥，將來她過身，喪禮一切從簡，不要搞風光大葬，發媽生前曾接受訪問說：「在生時孝順我先有用，死咗風光大葬做乜，我又睇唔到，咁浪費做乜。」發哥是很聽母親話，所以為母籌辦喪事也不會鋪張。發嫂指發哥母子感情很要好，母子兩人幾乎是每日通電話，每周定期見面，發媽的處世做人道理，對發哥影響深遠。

去年12月發哥曾到養和醫院探望發媽，當日發哥接受傳媒訪問時，指發媽是老人病，要進行身體檢查。