香港又再出現一個「電波少年」，佢個名叫陳軍富，今年20歲，上個月16號佢帶住8,000蚊新台幣（即係港紙1,900蚊）同一個25公斤重嘅背囊去到台灣，用步行方式環遊全台灣，𠵱家已經行完花蓮、高雄、台南、彰化等地方。由於佢每日只可以用200蚊新台幣（即係港紙48蚊），晚餐要喺路邊檔買幾個肉包搞掂，夜晚就搭帳篷瞓覺，又要自己洗衫，未亁就掛喺背囊上面，一路行一路晾衫。仲有一個禮拜佢就可以返到台北，完成旅程。
陳軍富係資深童軍，住喺秀茂坪，佢嘅夢想就係用步行方式環遊全世界，今次台灣之旅係踏出夢想第一步，為咗激勵自己，佢一路行都戴住「NeverGiveUp」（永不放棄）嘅手帶。陳軍富都有寫網上日誌，將唔少台灣之旅嘅靚相放咗上網，網址係 http://www.xanga.com/Water_Zachary。