【有發揮】何超儀演惡死女軍閥 與《都鐸王朝》男星藕斷絲連
蘋果日報 2019/09/21 20:25
何超儀陳子聰RajahJonathanRhysMeyers
何超儀將與尊尼芬賴斯邁亞斯在新片中合演。（資料圖片）
近年在國際影壇漸有名氣的何超儀，繼今年1月獲邀在美國影評人之選大獎頒獎禮（Critics' Choice Awards）中任頒獎嘉賓後，她最近原來接拍了一套新西片《Rajah》，該片為開發沙撈越的英國探險家James Brooke的傳奇電影，並由曾拍過大陸電影《黃石的孩子》、英劇《都鐸王朝》（The Tudors）的愛爾蘭男星尊尼芬賴斯邁亞斯（Jonathan Rhys Meyers）主演，而超儀飾演的林夫人（Madame Lim），是一名華人領袖，亦是男主角的舊愛。同片還有電影《魔戒》系列（The Lord of the Rings）中的「梅里」多明尼莫納漢（Dominic Monaghan）合演，他飾演男主角的表親和戰友Arthur Crookshank上校，並由著名MV導演Michael Haussman執導。
超儀回覆《蘋果》時透露今次是幾個機緣巧合促成此事，她說：「導演係我喺好多年前喺阿姆斯特丹電影節嗰度識嘅，佢一路都好想搵我做嘢，結果佢搵到我經理人再搵我。呢個係真人真事，關於James Brooke，一個英國人喺184幾年登陸咗馬來西亞嘅婆羅洲，佢對於呢塊土地同馬來西亞族人，佢哋睇到佢哋嘅另外一面，覺得佢哋係好人，就傾家蕩產都去幫呢一班好人，呢個係一個好值得人哋記得嘅古仔，所以我都好榮幸。」
超儀又講到自己的角色：「自從好久好久以前，演過《紫雨風暴》裏面嘅恐怖份子之後，我好似好耐都冇得演一啲同呢一類型相似嘅角色，我演一個新加坡華僑嘅女軍閥，又係一個礦工頭，我係男主角啲o靚啦，佢一叫我出動，我就會幫佢搵人嚟幫手。」她笑言角色應該有啲惡，又可能會接觸到動作場面。
能夠獲邀演出此角，超儀坦言心情興奮：「其實我對個角色都有好大嘅期望，因為今次個角色都唔算係客串，我演一個惡婆，但同男主角有少少藕斷絲連，我覺得可能會有好多地方畀我發揮到，所以我係特別興奮嘅。」
消息指，超儀與老公陳子聰的電影公司更會參與今次《Rajah》的製作，她指與老公跟導演認識已逾10年，合作係講心，她說：「我哋電影公司想拍一啲中西合璧嘅作品，同埋唔係錢嘅問題，係我哋落去幫吓手咁解，因為我哋係亞洲人，電影公司喺馬來西亞都識人，所以爸爸（陳子聰）就係監製囉！」