說好的美心妹妹楊鎧凝（Celine），說好的今日到荃灣出席「夏日熊貓學堂畢業禮」，但最後都係冇出現。

原定今日Celine係會出席呢個活動，份採訪通告都係咁寫，不過今日到場嘅係「新美心妹妹」胡梓盈（Keicy），點解呢？

現場有公關負責解畫，但版本完全不同。一個公關解釋因為邀請Celine期間，發生咗「嗰件事」(寫真風波)，Celine媽媽因此不想出席活動。

另一個公關就表示，因為發生咗「嗰件事」，所以主辦單位臨時換人。佢話唔係臨急換，只係出咗採訪通告，改唔切。

但睇番Celine個fb專頁，繼續有更新，見佢拎住嘅遮同個袋都印有某韓國時尚品牌嘅logo，未知是贊助商禮物定拍廣告，不過tag寫住thanks，應該都係前者。對上一次Celine拍攝樓盤廣告一出街，7歲妹豬應廣告商要求擺出充滿希望嘅表情，旁邊寫上「我想儲錢買樓」，輿論反應負評不少，相信亦為兩母女帶來不小壓力。

今次突然「執二攤」，Keicy媽媽就話：「我唔知之前搵邊個，我覺得小朋友要平台提升自信，都冇諗咁多嘢。」至於早前Keicy媽媽被爆曾與張柏文拍拖，佢表示不回應。