踏入07年僅僅兩周，恒指已較年初高位累跌800點，不少散戶以為港股會承接去年升勢，高追掃貨，點知做晒「蟹民」。喺《香港討論區》有網友做咗一個調查，問大家經歷今次調整，賺/蝕幾多？
不幸地，賺錢嘅人只佔少數，13.46%網友表示賺1萬元或以下，10%人賺1萬至3萬元，賺逾10萬元嘅就只得7.69%；相反，總共有61.54%網友話，因為今次調整而蝕錢，當中23.08%蝕咗1萬元或以下，15.38%人蝕1萬至3萬元，更有11.54%人話蝕超過10萬元（見圖）。
網友水不拉大喊：「3日唔見咗3萬銀，因為持有國壽（2628）重貨，1月至今賬面唔見4萬。」尹天照稱：「年初至今，大戶不斷沽貨，質低個價，令我賬面少咗萬二。」edl0022更指：「今次調整唔知幾時完，希望將近跌完啦，我賬面已經賺少10萬嘞。」
不過，「有賭未為輸」，大多數網友認為經過今次大調整後，港股會變得更「健康」，為未來升勢打好基礎，現時最好就係等調整完結，趁低吸納優質股。網友ribboy話：「今次跌市，好肯定係為升市而造勢，你睇A股日日升，轉頭港股又話要追落後。明年有奧運，唔驚冇理由再炒上，問題只係幾時大市會見底，捕捉到最大嘅升幅。」

terryctl1揚言：「大戶質低個市再收貨，之後港股就會大升，睇嚟今年唔難見二萬二至二萬三千點。」網友chung小寶話：「調整一吓，咁港股先可以健康上升，短期最緊要係日本唔好加息住，以免資金撤離香港。」
回顧去年，散戶都從股市賺大錢，曾有網上股市賺蝕調查，發現大多數網友都賺咗1萬至3萬元左右，更有3個網友話自己賺超過100萬元，賺錢主要係靠新股發威，及趁年尾市旺入市。相比之下，同𠵱家大市處於調整之中，真係此一時、彼一時嘞！