股海實戰錄:太協可趁低收集

蘋果日報 2002/01/11 00:00


美股前晚高開低收,港股冇藉口反彈,淡友得勢不饒人,恒指又再跌多184點,收11256。趙飛雲前日清倉避鋒頭似乎冇做錯,睇定啲再重組攻勢。
噚日提過嘅太平協和(438)走勢仍然硬淨,似乎唔太受恒指急跌影響。太協旗下嘅荃灣海天豪苑獲批出預售樓花同意紙,噚日開放示範單位畀傳媒參觀。海天豪苑批售,太協有資金回籠,可以投入大陸地產項目。
太協現時嘅賣點主要係上海100億元房地產發展項目,傳聞公司將會帶隊北上參觀地產業務,而近日股價走勢跑贏大市,值得留意,可趁大市回落,在0.62至0.66元水平收集,短炒跌穿0.60元止蝕。

大成生化傳炒上
趙飛雲前日碰到個老友,佢介紹隻大成生化(809),話短期會上試2.90元水平。近排民企當黑,跌完一隻又一隻,芬佬開始對呢類企業有啲戒心,屬高危分子,但大成噚日表現唔錯,好似有啲料到。不過,趙飛雲真係怕晒中資股啲突如其來消息,連中移動(941)都可以玩到咁盡,又何況其他公司呢!講起中移動,24元密集區有啲支持,不過暫時未到博反彈時候。