舊年股市長升長有，尤其係新股，幾乎抽得到都有錢賺，同今年真係天淵之別。如果家陣仲揸住舊年抽返嚟嘅新股，散戶應該變晒艇戶。
好似舊年10月「食正」新股熱潮上市嘅波司登（3998）咁，如果抽新股到家吓都未沽，賬面就輸緊錢，唯一安慰可能係有一眾大孖沙同你一齊坐艇。
得到恒地（012）主席李兆基、長實（001）主席李嘉誠、新世界發展（017）主席鄭裕彤、廸生創建（113）主席潘廸生，同國壽（2628），各斥資2500萬美元入股。事隔14個月，波司登股價由招股價3.28蚊跌到上個禮拜7毫6，富豪陪伴散戶一齊輸。
集團首席財務官麥潤權同華華講，主席高德康曾經同四叔李兆基、超人李嘉誠見面，知道佢哋仲揸住波司登啲股份，認真支持，但亦有基礎投資者經已賣晒啲股份，麥潤權話：「大家都明白要做好業績，股票市場冇人控制得到。」
上市至今，波司登累計用咗2.5億銀回購股份，麥潤權話明年底前仲可以動用最多5億銀回購，集團都唔排除繼續派特別股息回饋股東。

　

波司登最多再用5億回購

大摩發表研究報告話，波司登手持現金35億人民幣，加上零負債，損益表夠穩健；如果計及持有至到期嘅投資，每股淨現金相當於6毫7，畀「增持」評級，目標價2.15元。睇嚟各位尊貴嘅艇戶仲有排坐。

超人學細仔捧樂壇新星

超人旗下和黃（013）嗰檔3集團，除稅及利息前（EBIT）收支平衡時間，一改再一改，都唔知幾時達標。為咗盡快交差，前幾年佢哋將部份工程服務工序外判，又同競爭對手合作，共用發射站慳成本。諗住出年一定夠數，開始有正現金流，點知一場金融海嘯打亂計劃。
既然節流做晒，惟有諗吓點開源。最新一期集團刊物《Sphere》報道，和黃嘅丹麥業務──3丹麥，最近成立咗間3somemusic嘅數碼唱片公司，為樂壇新星提供一個演唱新作品嘅平台（圖）。歌迷可以直接用手機收睇，公司仲會自行聘請藝人，喺平台發表熱門歌曲。
除咗丹麥，3香港已經有音樂專門網站3MusicStation，英國有3MusicStore，3意大利就畀客戶隨時免費下載音樂。華華以為淨係小小超先至鍾意捧娛樂圈新星，估唔到佢老竇超人都唔執輸。

李華華
mailto:[email protected]