為預防武肺疫情擴散，針對食肆的防疫新規例上周六（28日）傍晚6時起生效。新規例實施一星期，《蘋果》記者今早到旺角一帶視察，不少食肆都有跟足規例，包括每張餐枱不多於4人、客人進入餐廳前都要量體溫等。

有消息指，政府今（4日）起將正式票控違規食肆，不過，記者在旺角未見有警員或食環署人員巡查或執法，卻發現有部份食肆疑違反規例。砵蘭街有食肆的枱與枱之間距離不足1.5米，卡位與卡位之間亦沒有放置膠板用作分隔；另在花園街也有餐廳無為食客量體溫就放行。

在太子的黃店青花亭，每張枱上都放置「限桌令·勿坐」的告示，分別寫上「昨天柒婆唔封關，今日餐廳搵田耕」、「今日疫情禁自由，明日廿三伏線留，禁足禁聲封你喉」，以及「民意被強姦，黑警加薪唔使慳，柒婆坐實唔肯躝，後果？香港人埋單」，諷刺港府防疫工作。

青花亭經理大波稱，新規例實施約一星期，生意額大跌逾半，「要跟足1.5米距離，原本餐廳有兩層可以客納約60人多啲，依家30人都坐唔到」。

生意額雖減少，但最令他擔心是「限桌令」猶如飲食業界23條，逐步收緊自由，「等於要我哋跟足你，唔跟足冇得營業」。他又稱，香港每日都有武肺確診個案，認為港府的防疫政策應由源頭做起，「香港人一早叫政府封關，一日唔一刀切封關，做咩其實都冇用。」

大波又稱，本港每日確診個案持續上升，「香港呢刻冇爆得咁（外國）厲害，唔關香港政府事，係香港人自律」。

社會亦有聲音指新規例最終目的要打壓黃店。光榮飲食在荃灣的分店日前曾30分鐘內兩度遭多名警員進內巡查。記者今早到光榮位於旺角的分店，該店跟足規例，如食客進入店內前都要量體溫等。店員指新規例下生意有受影響，過去一星期亦曾有警員到場巡查。另有不願意上鏡的食肆指，新措施下，過去一星期人流大減，生意大跌7成。

市民董先生批評，政府以抗疫為名，打壓黃店為實，「我屋企樓下有兩間火鍋店，係好出名藍店嚟㗎，我噚晚行過都見到一啲5個人、6個人一圍枱，全部一齊坐都冇事，相反隔離幾間黃店連開舖都唔敢開。」他炮轟港府在抗疫工作上後知後覺，認為要全面封關，「香港政府所有嘢都係後知後覺，如果一開始封關就唔使搞到今日咁樣！」

市民陳先生就指新措施對其影響不大，「返工會叫外賣，可能等多10幾分鐘。」但他批評政府執法偏頗，「唔係黃店就捉得鬆（手）啲、見到菲傭一班人聚集就視而不見，唔知係咪佢地英文差啦」，指政府執法準則不公，令到好多人憤怒同氣憤。陳小姐也認為政府執法是針對黃店，「黃店通常好少位，啲cafe得兩張枱，但只可以入一半人，即係叫佢地唔使做生意。」

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架