葉楚航過往都倚重潘頓、雷神等大師傅，但今季模式有所轉變，合作最多係李寶利7戰2季，其次賴仔6戰2冠1亞，打游擊還有黃皓楠、黃俊、潘明輝等本地薑，反而潘頓只合作一次咁多，在季初偏重華將做主力情況相信會持續。

其中最令人敬佩當然重用大師兄賴維銘，下風騎師，44歲老將，二人合作勝出率高達33%，尤其「軒轅齊飛」難出頭馬打破齋砵，更是拍爛手掌，你夠胆用，我就落力拚搏，騎練都打出身價波。

今個周末（22日），「霸勝」爭取連捷，固然係焦點所在；另一位季初常常幫葉廐操馬有黃皓楠，今季晉升為大師傅，即憑「贏馬神器」贏馬，一招先發制人，力拒潘頓「美麗日子」來犯，騎功走位愈來愈成熟，手長腳長係黃皓楠特色，爭取多些出外國策騎經驗，假以時日，甚有機會挑戰梁家俊一哥地位。

周末「深愛」馬房出王牌上陣，一早卜定黃皓楠過檔，最鍾意9月4日大閘，出閘應聲彈出，一放到底，彈甩快馬「團結精神」及「都靈紅星」，本身所造時間，全日四組1200米閘中最快，比第二組「贏科超影」快0·14秒，若果用上述三駒做指標，「都靈紅星」復出跑第二，「贏科超影」輕鬆贏馬，今次「深愛」落四班跑首本1400米，贏面盡在不言中。