港股上個禮拜嘅走勢好似病貓咁,5個交易日裏面跌足4日,好多投資者都話係因為外圍偏弱,又話印巴會打仗,所以令到港股跌到落去啲主要支持位都唔識得「重振雄風」,反而重愈跌愈有。
伏勝認為今次港股之所以咁弱,完全係因為上個月太多投資者睇好後市所致,當個市升唔穿心理關口萬二點後,就引咗好多人出嚟平好倉,甚至反手造淡,所以個市喺成交升番些少下,回吐壓力重愈來愈大。
聽行家講,由於後市仍然唔見得會回升,出面班Trader已經部署今個6月唔做咁多嘢,因為大家手頭現貨唔多,如果個市挾咗上去,對大家都無好處。佢哋重話,如果唔係政府禁賭波,佢哋寧願攞多啲時間去賭波,都唔會選擇喺6月買股票。
傳聞將會批股
上個禮拜二開市交易咗15分鐘就叫停嘅辰達永安(1189),聽講今次之所以咁急停牌,主要係因為公司同北京京泰傾緊有關注入北京旅遊項目,已經到埋門一腳,為咗唔想個價俾人亂咁舞,所以惟有暫時叫住停賽先。