公民黨改選新一屆執委會，帶領未來兩年黨務發展，其中創黨黨魁余若薇無再參選執委會，正式退出領導層，令當年創黨四大狀（余若薇、湯家驊、吳靄儀、梁家傑）中，剩返連任主席嘅傑哥繼續留喺黨領導層，余大小姐交代點解唔再參選執委時，身邊「徒弟」陳淑莊激動到哭成淚人。

傑哥記招上向余大小姐送上鮮花致謝，祝福對方退下前線後生活愉快、身體健康，笑言：「我唔會畀佢（余）輕易甩身嘅」，又同余講：「唔好忘記公民黨啊！」，余大小姐即時回應：「唔會（忘記）」，一班黨友聽到，即拍手向余致謝。傑哥會後感觸話：「我頭先都差啲喊，因為余若薇（退出領導層）真係一個時代嘅結束，四大狀喺執委會剩返我咋！」

余大小姐會上分享時話：「我覺得萬物有時，我由創黨到宜家，講緊係12年，都係一個幾好嘅數目，我見到公民黨亦都多咗好多年輕黨員，我哋執委嘅額只係得廿個，咁所以我覺得係時候退落嚟，讓一啲更加年輕嘅人可以加入執委，但唔等於我唔係公民黨嘅一份子，我依然係公民黨嘅普通黨員，公民黨上上下下，同好多發生緊嘅事，或者未來要做的事，你都會見我嘅蹤影」。陳淑莊此時一度破涕為笑，搭嘴話：「例如寫揮春」。

問到對新一屆領導層有何寄語，余大小姐話非常感激新一屆執委會，亦非常感激公民黨嘅立法會議員、區議員和前線的工作者，認為佢哋都喺香港非常艱難嘅時間繼續努力，積極發揮公民黨精神。問到過去12年出任黨領導層其間有乜嘢最深刻？余大小姐話好多事都係整個公民黨上下有份齊心出力，包括佢2010年同前特首「煲呔曾」曾蔭權就政改辯論，所以好多事都令佢非常感動同感恩。