媾女王吳浩康（Deep）被爆一個月內連𠝹六女，令他與未婚妻鍾舒漫的婚事取消。昨日又有讀者爆Deep過去風流史，指Deep於二○一一年與莊思敏分手後，跟𡃁模Hazel（唐紫睿）拍拖前，曾經速𠝹女歌迷。
據爆料人指與Deep曾經拍拖的歌迷叫Jesamine，是一名九十後富家女，在加拿大讀大學時已傾慕Deep，經常從instagram追蹤偶像動向。Deep與Jesamine在網上交換電話，Deep隨即發動電話攻勢，又透過webcam自彈自唱冧女。Deep雖曾涉吸毒及愛媾女，但他「洗腦式」向Jesamine講改過自新的心路歷程，Jesamine深被打動。二○一一年，Jesamine回港度聖誕即與Deep撻着，在Jesamine的facebook發現Deep彈琴背影，更留言指陪Deep作曲，在Deep的ig亦見兩人互說晚安，足證親密關係。但有指Jesamine家人極力反對，Jesamine漸漸發覺Deep脾氣大，又懷疑對方與張栢芝交往；當Jesamine回加拿大後，戀情便不了了之。

張致恒：佢爛玩係人都知

有指鍾舒漫舊愛張致恒（Steven）亦知道Deep媾歌迷，Steven昨在電話說：「唔知喎，好少見啦。但識佢十幾年，佢爛玩係人都知，𠵱家變成點就唔清楚。」可知Deep偷食？他說：「唔清楚，好多人都係咁，佢哋私事。」鍾舒漫易心軟？他說：「佢係基督徒，好易寬恕別人，當然唔係一般人可以做到，佢係一個好有愛心嘅女仔，乜人講嘢佢都信，佢有諗過自己行嘅路，我支持佢。」
另外，與Deep夜蒲的Heidy Ho早前被爆已為人妻，原來她多年前曾在Deep的《洗剪吹》MV做女主角。而Deep正印女友鍾舒漫昨晚於微博上載一張素顏相，留言：「度和音，我最愛！」似要暫忘情傷，寄情工作。
採訪：嵐山、皓騫