成日都有人問，在港出賽的馬仔嚟嚟去去都係四隻腳一條尾，最多唔同顏色，究竟平時喺係晨操或試閘嘅時候，可以點分又唔會撈亂呢？

遠睇就係靠披住馬仔背部嘅烙號布，去分辨過在港過千隻馬匹，例如同行見到烙號V325的賽駒現身沙田馬場，一睇就知明星馬「巴基之星」出嚟操練。

至於今季來港的C系列新馬，就會用一塊棕色底黃字嘅馬匹號布，布上面嘅冧巴就係按今季嚟港嘅時間順序排列，即C001就係今季最早到嘅馬，而「巴基之星」嘅V字，即代表呢匹馬係於15/16年度馬季來到香港。

但因為WXYZ遠睇太似數目，所以馬會為咗避免有誤會，所以將呢四個英文字唔用，前季開始由A字順序用落去，所以V字之後就直接用英文字C，以辨別新季入口的賽駒。

啲馬仔平時唔操馬冇咗塊布，就靠每隻馬嘅左上前腳上少少嘅位置，都烙印現役馬之間唔會撞嘅烙號，以確保V325就係「巴基之星」，以資識別。

雖則話有烙號分辨唔會搞亂，但係上季都試過一次烏龍事件。事緣告東尼馬房搞錯咗轄下兩隻「巴基」仔嘅號布，「巴基之星」披咗「巴基小子」塊（S）442號布出操，而呢次人為錯誤，就搞到練馬師告東尼被馬會罰咗5,000大元。

好彩嘅係，近年一直冇未出現過賽日跑錯馬事件，唔係就上硬《蘋果》頭條都得嘞！