當年今日
關於我們

周汶錡刀槍不入密賺EasyMoney

蘋果日報 2006/02/26 00:00


除了近期與黎明拍拖的樂基兒,過去三年見報冠軍的香港模特兒,非周汶錡莫屬。講好,周汶錡是首個成立模迷會的名模,出結婚書、旅行書。講壞,傳整容、隆胸,登上雜誌封面,名列被富商照顧女星模特兒名單,加上甩拖的杜德偉、台灣的連勝文,和時刻計算準確的性感尺度,周汶錡的確話題最多,最難得是任何時候都笑容可掬、百毒不侵。
名模周汶錡(Kathy)在觀塘月華街長大,從不自覺靚女,亦不想做明星,直至有auntie建議她參選香港小姐,才有所覺悟。結果她沒有選港姐,原因是抗拒講求規行矩步、斯文的港姐形象。周汶錡自細對扮靚已有堅持,四、五歲沒有合心意的粉紅裙,會扭計缺席自己生日會,她說:「我同媽咪好似,一係唔買,一係要買到自己覺得最好嘅,所以佢由得我。」她續說:「我鍾意fashion,係天性。」
無工開先識驚
畢業即入行做模特兒的周汶錡,九五、九六年一個月開工二十日,已賺到數萬元,對比當時大學生月薪,前路很清晰,直到九七金融風暴來臨,她說:「大騷細騷乜都冇,連續幾個月坐喺屋企,先識驚!好彩之後好順,大前年沙士我都有工開,最忙,五月一號喺上海拍香體露廣告,全間文華酒店得我一個人食早餐,後來有二十幾個臨記,冇人戴口罩,我心諗:『死就死啦!』照做又冇事喎。」自此,專心愛上做模特兒。
隨着知名度上升,負面新聞亦多,多次被指整容、被富商照顧云云,不論真或假,周汶錡沒有哭、沒有死撐,一味笑住鬧,任你寫,她說:「我最滿意自己性格,比較樂觀囉,EQ高過IQ!我見到啲人(對記者)鬧鬧鬧鬧,我會諗,做乜嘢啫,人哋都要做嘢㗎。」她謂小事會體諒記者,反正傳媒寫錯不會更正,解釋亦沒有人願信、願寫,一路以來的開心兼方便策略,是「算吧啦」!
信愛情飲水飽
不過,最令周汶錡扯火是指她隆胸,她講起仍然怒火難平說:「你幾時見過人隆胸,垂低手條疤都突晒出嚟?我係粉瘤就係粉瘤!若果隆胸咁失敗,我都唔賣underarm(脫腋下毛)廣告啦,仲唔收收埋埋咩。你話我係男人都得㗎啦,好似嚴咩咩咁(編者按:嚴淑明),我唔記得名,我點證明我唔係啫!」她一度想出律師信保障客戶,但傳言又忽然像一陣風消失了!
講到愛情,由舊愛杜德偉、追求者吳嘉龍、迴響最大的連勝文、到大量似是而非的uncles及洋漢,周汶錡自認專一、重感情,絕不濫交,近一年多的單身生活更是最長一次感情空白期,她說:「我好重感情,你睇我之前(同杜德偉拍拖多年)就知。搵到心愛,你叫我唔做嘢、結婚生仔,OK,但唔畀我去街,限制我活動就唔得!」她又補充:「好多人覺得我要錢錢錢,我話你聽若果鍾意,就算係打工仔我都唔會白鴿眼,隨時等緊愛情嚟!」
empty
性感從不托手踭
小記認為全港女模界中,以馬詩慧最直、最爽,其次輪到周汶錡。講一個小故事,小記叫周汶錡影性感海報,她聽完說:「嘩!畀啲van仔哥哥貼喺車,唔影!」嘩完一輪,照sayyes。之後,幫周汶錡借性感衫,兩手準備,A餐是掌心尺寸的比堅尼加熱褲,B餐是sell飄逸的V領背心加及膝褲,最足以交差,當然是美味A餐。周汶錡講明泳衣免問,最終肯折衷自製AB餐混合體,二話不說,在人來人往的salon坐下來,擘腿,還私人醒一句:「得啦,知你要乜!」好直接?正正是香港人最鍾意的。
撰文:DebbieLum
攝影:MatthewLam
化妝:OmixB
髮型:DebbyofHair
服裝:Fendi
場地:Hair(銅鑼灣)
empty
不介意性感示人的周汶錡堅持有要求,不是隨便露肉。