機場管理局行政總裁彭定中喺機管局做咗6年，噚日lastday，臨走前同傳媒聚舊，華華當然唔會錯過。雖然佢3年前幫政府籌備機管局上市，不時同商界及業界講解機場嘅發展策略，但家吓佢要走喇，機管局都上市無期，好似嘥晒佢啲心機。
彭總就好豁達，以釣魚嚟形容機管局上市，認為「大家應該享受釣魚嘅過程，唔好掛住有冇魚上釣（比喻機管局成功上市），幾時釣到條魚亦唔重要，呢一日總會來臨嘅。」
佢仲誓神劈願咁話，如機管局第日招股上市，佢會係第一個買機管局股票嘅人。佢咁講，除咗反映佢滿意機場過去幾年嘅表現，亦見到佢對新行政總裁許漢忠相當有信心，應該可以令機管局業績更上一層樓。

有感而發　人生如戲

雖然機管局仲有兩個月先至年結，但彭總估計，如無意外，機管局截至今年3月底止全年業績可再創紀錄咁話。
事實上，彭總自01年初加盟機管局，幾年間已令機管局盈利由01至02年度嘅3300萬元，增加到05至06年度嘅16億元，06至07年度中期都賺成9.9億元，可算交足功課。所以佢總結呢6年嘅表現，都話「noregret」。
彭總加盟機管局之前，喺杜邦公司工作，佢自己都話，以前四圍飛嚟飛去開會，使用各地機場嘅機會就多，從冇諗過自己會走去管理香港機場。不過，「人生就好似演一場戲，所有人都係演員，但冇人可以永遠做同一個角色。」佢今日開始不再扮演機管局行政總裁呢個角色，坐喺台下當觀眾，第日見到台上演員表現出色，應該會更大力拍掌。
[email protected]