Franklin很友善，估計年過40，對幪面超人了解極深，有大量珍藏，而且喜歡穿着幪面超人服上鏡，這樣一個訪問對象，是有趣、足料的保證。可惜，Franklin在訪問前一日致電筆者：「你如果問我做咩工作，屋企人有無反對我呢種興趣呢啲私人問題，我係唔會回應嘅！」這兩題正是筆者準備劈頭問的，難道要我問：「你估幪面超人平時咁唔黐家，佢屋企人會唔會反對佢做英雄呢？又，你估佢身為幪面超人，又有無儲自己啲Figure呢？」正擔心訪問如何收科，Franklin卻在見面後補多一句：「等陣我女朋友都會喺度，不過佢唔接受訪問唔可以影佢相，記住！」踩多一腳，我真的很害怕這次訪問會變成「幪面超人35周年發展史＋Fans心路歷程轉變座談會」，聽落很專業，但很悶……

幸好，Franklin真的很喜歡幪面超人，大部份問題只要加上「幪面超人」四個字，他也會暢所欲言。好像之前說過不會提的家人，「細個嗰陣爸爸媽媽好捨得買玩具畀我，初接觸時我連佢叫幪面超人都唔知。我好記得，嗰陣大丸百貨對面有間華生文具，當時媽咪帶我去買玩具，我就被一盒油畫封面，有個幪面人坐住架電單車飛起嘅模型吸引，之後買咗砌埋，到有一次同屋企人去飲，唔知邊個親戚有本幪面超人漫畫，即係嗰陣$0.5一本好薄嗰隻，我嗰下先知佢叫幪面超人1號！」就像初戀情人，買模型的叫「華生文具」，飲喜酒的叫「珠城酒樓」，由初邂逅到熱戀的整個過程也記得清清楚楚。

見面時到達Franklin特登租來放珍藏玩具的地方，筆者問：「不如着套幪面超人衫落街影相吖？有特攝Feel嘛！」Franklin回應：「唔好喇，套衫好熱！」再諗計，天台亦是好地方，Franklin姑且一試，結果萬分興奮：「嘩，好正！無諗過天台原來好有特攝Feel！」發自內心，不再怕熱，甚至拍攝時下着微微細雨亦不介意。原來，一直不是怕熱，「呢度下面好多車房，好雜，啲車房仔見到實搞搞震。」大膽講句，Franklin應該介意別人怎看他，介意被人知道他的工作。穿着幪面超人衫在公開場合亮相，只因為現場看到的也是同好。

花時間花功夫花錢弄了套服裝，很希望將自己代入角色。「讀小學開始就睇幪面超人。」從Franklin的對答和拍攝前的準備來看，他是個認真的人，實話應該會實說：「我每遇挫折都會諗起幪面超人，佢畀到一份鬥志令我振作，成個人都好熱血！」

是專家，當然有獨特觀點，幪面超人劇集，在Franklin眼中絕非是無厘頭超人打怪獸大爆炸收場兒童節目之流。「幪面超人係被撒旦幫捉去作生化改造，我覺得撒旦幫就好似二次大戰裏面日本黑太陽部隊，係石之森太郎對日本喺二戰中嘅行為反思。」Franklin肯定地說。是石之森太郎生前說的嗎？「唔係，係我自己領會嘅。曾經有一個奸角叫『佐魯大佐』，佢着住套衫直情好似德軍軍服咁，所以我覺得幪面超人嘅世界觀好廣好深。」這亦是Franklin不太喜歡鹹蛋超人的原因，之外還有：「真實感強好多，幪面超人係人類變成的，而且改造人都真係喺世界上面存在，好似𠵱家都有啲人換咗機械心臟，或者因傷殘裝上義肢。但係現實中，邊有咩M78星雲吖。」佩服Franklin隨時比本鄉猛更了解自己，「悲劇英雄，呢個世界充滿住悲劇英雄。本鄉猛被迫被改造，之後經過痛苦掙扎，再決定運用自己力量去對抗惡勢力，唔係為咗威唔係為咗出風頭，好有正義感！」

Franklin和幪面超人，曾經分隔兩地，但是，愛是沒界限的。「有幾年我去咗第二度讀書，無幪面超人睇，我哋幾年無見面。」Franklin說回港是約1990年，繼幪面超人ZX劇場版後，久違的幪面超人再次在日本開拍劇集，而且香港亞視更購了版權，在黃金時段播放。「嗰一下再次勾起我對幪面超人嘅熱情。」Franklin說由那一部幪面超人Black開始，他再四出搜購曾經擁有但因搬屋而掉了的玩具，幪面超人珍藏品，粗略估計價值超過20萬，而且這個估計真的非常粗略，因旁邊的Aron大嗌：「我話起碼值成百萬都有機！」

事先張揚不說私事、喜歡昭和Rider（1號開始至BlackRX）的Franklin，不喜歡別人知道他的生活，他維持這嗜好的難度、經歷，但為了幪面超人卻甘願出鏡，才算瘋狂。

喜歡平成Rider（即是新一代幪面超人如龍騎、555）的Aron，在態度、對答上也給人知道他待這些東西只是興趣，很正常。

總結一句，新一代愛得簡單、隨便；舊有的愛卻永遠是瘋狂、執着。全中！

Aron那幪面超人555衣服更真實，更貴價，但他的訪問佔較小篇幅，不是因為他不肯說私事，而係他的一切也說得太平常。「我鍾意咗幪面超人一年幾咋！」「因為睇電視見到幪面超人555啲裝備幾有型，所以鍾意。」「唔會介意，我Keep住都無乜女朋友。」「屋企好多模型玩具，堆到成屋都係。因為自己係漫畫迷；屋企玩具模型收藏價值估計都過百萬嘅。」「得我同我爸爸我大佬住，唔會鬧我多嘢。」問一句答一句，沒有想過隱瞞甚麼，Aron自己也說不怕人知道他買了這套幪面超人衣服：「我從事電影行業，我個製片都知我有套咁嘅衫，仲叫我借畀佢着吓。」更不怕的，是別人怎看自己：「我鍾意咪做囉，我覺得唔使一定係喺某個年齡先可以做某件事，我鍾意，覺得開心嘅，60歲都會買套衫返嚟着。」筆者肯定這番說話是真心的，因為Aron曾經和筆者一同游說Franklin到街上拍照：「落街影吖，好好玩，上次我落街影相，喺𨋢見到啲人望住我好驚訝咁，好搞笑呀！」

訪問之後，連續兩晚接到Franklin的電話，「你訪問時有無錄音？無？怕唔怕抄漏資料？」「記得唔好出我換緊衫張相。」「有無資料要補充，對幪面超人嘅歷史清楚嘛？」很着緊，着緊是怕筆者寫錯幪面超人的資料，他真的迷得很專業。掛線前的一句：「我影相嗰日個鼻損咗紅咗，你見到就幫我喺電腦執一執啦！」那份執着又來了，原來Franklin不算愛得瘋狂，因為他愛幪面超人之餘也懂得愛自己。
最後，要澄清！這張筆者發癲「變身」照片只是試燈試位拍的，可惜不慎給老細看到，難得有人欣賞覓得知音，而且是高層，我無得揀，惟有照登。留意！我不是自願的，我不是幪面超人迷，給人看到我做這個騎呢變身姿勢，會面紅的！

Profile
姓名：Franklin
年齡：不透露，從他迷上幪面超人的年資加減乘除估計，4X歲。
職業：不透露
收藏總值：20萬以上
最愛的幪面超人：1號、V3、Black

Profile
姓名：Aron
年齡：3X歲
職業：電影業
收藏總值：港幣1萬（上鏡這套幪面超人服）、其他動漫玩具則約100萬
最愛的幪面超人：555