亞視搞亞姐選舉先有仁美清叙嘅出現，首屆亞姐冠軍黎燕珊仲做咗會長，兩年前羅霖離婚兼傳媾仔，黎燕珊就揶揄羅霖影衰亞姐，踢佢出仁美。黎燕珊近日仲將仁美撤出亞視總台，另找會址。黎燕珊被指騎劫仁美，噚日有報道指亞視高層葉家寶有構思搵羅霖另起爐灶大搞亞姐會。

「慈善無分你我」

黎燕珊話唔知呢件事，佢噚日喺電話度話：「我離開亞視兩年，仁美之前重組都已搬咗出去，葉家寶仲好支持。我哋全部義務做善事，即使再多20、30個會，只會有更多有需要嘅人受惠。」羅霖噚日接受訪問時雖然話冇人搵佢搞亞姐會，但對黎燕珊就句句有骨，又暗示有人忘本：「我覺得慈善唔係一個人，要大家努力，多啲人參與，做人要飲水思源，之前做慈善抱住幫人，發生咗啲事好無奈，有啲人諗法唔同，做慈善應該唔分你我，畀多啲機會其他人。」
亞姐會未成立，楊玉梅就聲言要撐羅霖：「仁美架構有問題，大家尊重珊姐係首屆冠軍，點解佢要將仁美同亞視劃清界線，佢有啲霸道同野蠻，個會唔夠透明度。」
撰文：馮仁昭