「無論係香港定係世界任何一個地方，政治世界就係污糟邋遢嘅世界，從政手段就只有卑鄙、奸詐，除咗呢樣，就只有更卑鄙、更奸詐。大家如果想得到公義嘅話，我可以話俾大家聽，一個公義嘅人，絕對，亦無可能幫你哋達到目的。」

「你哋唔好再自己呃自己，你哋只可以靠一啲自私嘅人，當嗰啲自私嘅人得到佢得到嘅嘢，佢滿足咗之後，佢先會企出嚟為你哋爭取你哋所想。呢個世界就係咁醜惡，我哋要面對現實，我哋先至可以行我哋嘅路。大家企出嚟睇吓我哋嘅世界，呢個就係我哋嘅世界，呢個就係我哋嘅選擇！」

鼓佬你好嗎？選舉又臨近了，5號劉俊雄不會再有機會參選了。但你那番話，仍然鏗鏘有聲。特別是今年，立法會選舉年。對香港而言，意義重大。

事有湊巧，無綫J5——播普通話新聞用簡體字嘅J5，由噚晚開始，逢周一至周日晚上十點半重播《天與地》，就真係令人好期待。劉俊雄回應唔到，由林保怡代勞回覆《蘋果》：「《天與地》重播又唔關政治事，係套劇好睇，神劇吖麻，神劇就係神劇，應該早啲重播添啦！」

阿Yan佘詩曼就謂：「每次重播我嘅劇本，我都好開心，可以讓自己及觀眾重溫我演嘅角色，《天與地》都係其中之一部自己好鍾意嘅作品，亦都好期待再同戚其義監製合作！」Ronnie黃德斌接受傳媒訪問話：「可以重播梗係開心，呢套劇嘅劇本同製作方面都係好不一樣嘅劇，當時拍攝同整體製作氣氛，都係一個好好回憶，希望未睇過嘅觀眾，可以睇吓，睇過嘅觀眾，可以回味再睇，我相信呢個組合，喺TVB裡面係唔容易再有，所以依家睇番都有好多感受。」

不少網民都話，晚晚一定要睇《天與地》重播，都唔想睇依家大台播嗰兩套劇。網民除咗有高登巴打，就連維穩味道較濃嘅香討、甚至親子王國都在熱論。有阿媽留言:「天與地，一睇再睇三睇都係咁正！」有香討網民留言:「大台咁得意嘅，喺呢個時候播呢套劇，集集『如果命運能選擇…』，好似幫人助選咁。」哦……

另一位網民就話:「第三次重播了，不過都支持，阿余同陳豪做得最好一套。」其實今次係第二次重播。2012年首播後反應熱烈，之後於myTV網上重溫一個月；至2013年1月首次重播，所以今次係第二次重播。

9月4日立法會投票日，如無意外，當晚會播第十四集，劉俊雄已開始選舉工程，Ronnie記番佢哋當年喺雪山上嘅一切……無論你選擇係點，記得盡公民責任，投下你神聖一票。