特首林鄭月娥果然有新猷，新一份施政報告有啲新玩法，除咗縮短宣讀時間以及取消吹風會等等，措施上亦有別過往兩任特首，至少有啲煲呔同689唔肯做嘅建議，佢都肯一一吸收，例如以港鐵股息補貼車費及改革稅制推利得稅兩級制等，過往唔少政黨同團體都有提出過，但一直未有落實，直至女特首上場，先至有啲眉頭。
政商界近日都討論，如果係薯片叔勝出，上述政策會唔會出爐？冇一致結論，但就普遍認為，除咗林鄭自己有啲新思維，亦要多得前兩屆政府、即係曾俊華連任兩屆財爺嘅政府，幫佢儲定糧，皆因薯片叔同煲呔理念相近，奉行自由市場、積極不干預政策，亦唔會亂使庫房錢，情願儲定錢應付金融危機，庫房唔水浸就假。