身為粵劇名伶新馬師曾（鄧永祥）嘅大仔，鄧兆尊喺演藝事業上面就比老竇差唔少，一開始只係喺《歡樂今宵》做下趣劇，而由於佢身形瘦削，所以成日喺趣劇中飾演下把位，有時都會模仿下其他名人，之後就係喺處境喜劇《皆大歡喜》中飾演高爾康、《封神榜》做木吒，雖然係閑角，但係都叫做有人識下，反而《國產凌凌漆》入面出嚟被人槍斃等等嘅周星馳系列仲深入民心。

不過鄧兆尊都叫做食正獎門人系列條水，頻頻上去玩遊戲搞下笑，而且可能因為之前做慣下把位，玩得嚟夠放，都幾有觀眾緣㗎，而且因爲阿爸新馬師曾被稱為慈善伶王，所以鄧兆尊仲被人改花名叫慈善羚羊。