「走四補一」，睇得出英格蘭對待今晚深夜作客意大利友賽嘅心意，不過，人少唔等於唔夠踢，計出場嗰11個正選，英軍新陣老虎仔多，夠喺意大利都靈市坐和望贏而回，安心返英超打埋季尾餘下硬仗。
為保障土炮飯碗，來屆英超實施新制，一啲世界排名較低國家嘅外援，未必咁容易闖進呢個「荷包腫脹」嘅足球名利圈；呢類咁有保護主義色彩嘅條例，成效如何，要長遠啲先睇到，但發財立品，加埋豪派從國內電視轉播收益中得到嘅五分之一，約10億鎊，畀英超以下嘅球會攤分，英超高層認真識做。唔怪得，英超躉撳錢交幾百蚊月費睇波，少有怨言，仲好似背後有把聲音，向我哋募捐，泵水培育下一代英超新星，咁有使命感。

係叻嘅，唔使踩住其他人，他日一樣可以大放光芒，講緊係哈利卡尼。雖然有評論話佢要踢多10場國際賽先可以證明更多，喺英超，個人會睇多一兩季；但機會嚟到，真係擋都擋唔住。嚟緊英超周六早場即有阿仙奴大戰利記，史達寧同韋碧克兩鋒將，傷又好留力又好，提早聯同其他兩人退隊，唔踢友賽合理；但造就「兩尼」呢對射球機器，今晚鬥意軍，有望首次同場擔正，都幾有期待，可惜就算交咗月費，本地幾個收費台都冇安排呢場波直播。
舊嘅朗尼，入球源源不絕（47球），快破卜比查爾頓國家隊紀錄（49球）；新嘅「九號位」球員哈利卡尼，入到唔識停。睇番英軍今年賽程，除咗今晚外仲有七場，最硬嘅對手、暫時安排到喺年尾鬥法國；陣式上，朗尼做膽，但未必係有韋碧克就冇卡尼，既然出線明年歐國盃決賽周冇懸念，今年嘅波可多練4-3-3陣式，畀卡尼打柱躉中鋒，速度高嘅韋碧克轉打邊，學阿仙奴咁就基奧特，可能多個殺着。
英軍唔齊人，今晚三線仍然好手如雲，英超剝奪土炮生計，阻佢哋上流機會之說，好似唔多成立；除咗周六「雙紅會」外，曼聯只係主場鬥阿士東維拉，而除卡尼外，仲有基爾獲加、賴恩美臣同安祖斯唐辛入選嘅熱刺，去到下周日先作客般尼。阿仙奴嘅國腳基蘭基比斯同禾仔，近排喺球隊失去正選，呢班邊緣球員今晚有機會落場爭上位，又可幫國家隊自去夏世盃後延續八連勝，不拼何待？
相反，意大利，對比去年夏天世盃贏過英格蘭2:1，現時陣容弱得多，尤其前線，冇巴神，𠵱家六位入選者加埋得四個入球；中場大將，原本今場有主場之利嘅祖記好手派路同馬治斯奧早續缺陣，球隊啱啱喺歐國外雨戰下，完場前逼和保加利亞，毫無霸氣，成熱門一方，不值捧。
文：波神