藍奕邦一連三場喺灣仔藝術中心舉行嘅音樂會，前晚尾場圓滿結束，邦邦請咗周國賢做嘉賓，但最驚喜係楊千嬅突然做神秘嘉賓，邦邦知道千嬅推咗新城國語力頒獎禮，獎都唔攞都嚟支持自己，激動到攬住千嬅狂喊。一向性取向成疑嘅佢，前晚着住絲襪，形象妖野又大膽，似足黃耀明上身，佢喺台上話自己係雌雄同體，又玩不文同講有味笑話，仲問睇到佢着絲襪嘅fans：「係咪睇到扯旗？」

自認雌雄同體

邦邦又邊飲酒邊唱歌，飲到highhigh哋仲做出不文動作，用咪隊住彈緊結他嘅周國賢下體外，又從後伸手摸周嘅胸肌，之後又瞓喺劉浩龍褲襠唱歌，搞到全場fans好鬼high。邦邦仲感觸到喊，佢話：「藍奕邦係一個真正好man嘅男人，因為我有責任感、有承擔同吉士。」之後佢又向台下嘅爹哋話：「多謝爹哋畀我喺冇壓力嘅環境下成長，完全冇忌諱，今日可以做到想做嘅事。」事後邦邦接受訪問，問佢係咪喺爸爸面前表露身份（指性向）？佢有啲避忌話：「唔好咁講，我喺台上係雌雄同體，我只係想爸爸見到我藝術上進步。」前晚許志安、組合Mr.同Evelyn都有捧場，但就唔見Mr.成員Tom，唔知係咪避見舊愛Evelyn呢。