大市真係好難睇！不是嗎？美股又插兩舊幾，諗住港股噚日實死冇生，點知恒指只低開78點，然後節節上升。那邊廂警察喺金鐘拆棚，形勢再趨緊張，這邊廂港股卻越挾越有，中移動（941）、港交所（388）齊齊倒升，一度帶領大市升近300點。可惜，一剎那光輝唔代表永恒，好友防線再度失守，恒指倒跌收場，執筆之時期指更穿埋22900點，形勢不容樂觀。
指數偏弱，成交更創一個月低，從好嗰方面睇係沽壓不大，但更有可能係唔捨得沽，希望博彈高啲先走，陰跌市況永遠最蝦人玩。細價股繼續喪炒，成為大市唯一亮點及希望，正獲洽購股權嘅瀚洋物流（1803）及格菱控股（1318）炒高兩成，加埋成交近億銀，鑊氣十足。一直有叫大家吼實嘅現金牛亞洲聯網（679），終於大棍崛起，單日爆升33%，完美破頂，追落後可睇住另一隻經常品題嘅星光集團（403），同亞洲聯網質地相似，日線圖已行至三角形末端，爆升可期。