力寶(226)無論相對系內或亞洲區磚頭股嘅折讓,吸引到不得了,力寶超抵買。力寶最新每股NAV10.73元,現價(2.96元)折讓72.4%,系內香港華人(655)NAV折讓63%、力寶華潤(156)得38%。力寶份屬旗艦,全程受惠呢兩家企業嘅資產增值,但折讓仲咁大,講唔通。就算喺力寶重點發展嘅星洲,當地重磅磚頭股好似嘉德置地及城市發展,折讓已經收窄到唔夠50%。力寶仲有呢個折讓水位,又係離晒譜。
喺低息兼量化寬鬆時代,資產價格繼續吹大,係咁意計數,以力寶6月底投資物業加聯營公司賬面值87.4億銀,重估多20%,已經可以額外增值17.5億銀,超過集團現市值14.8億銀。力寶重秤後每股NAV14.23元,折讓近80%,就算翻一番到5.90元,折讓仲高達58%。