港姐許亦妮(Whitney)近日成功釣得金龜,同太陽集團有米高層盧啟邦(Andrew)撻着,佢被本報拍到由韓國拍戲返港後,就火速密會男友。今日Whitney同何佩瑜、寸嘴Barbie夏尉喻、文凱玲及王寶寶等,喺上水出席無綫《玩轉世界盃》活動。
記者就報道表示恭喜佢時,Whitney就話:「我哋係朋友。」咁係乜嘢程度嘅朋友呢?佢就話兩人了解中,沒人能保證將來:「我嗰日病病哋,所以掩面,有啲尷尬!」哇﹗病病哋仲同男方會?此時Whitney就死撐一早約好。
咁對方係咪佢鍾意嘅才俊型呢?Whitney就話:「咁佢係一個好叻嘅男人,都好好,希望大家尊重番佢私隱同畀空間我。(佢係筍盤?)我都係筍盤呀﹗」
另外,有報道傳陳雅倫懷孕箍李思捷,身為思捷舊愛嘅王寶寶(春卷)反問記者:「邊個0架?如果係會恭喜佢,替佢高興!」春卷表示同思捷有聯絡,但佢冇向對方求證:「我只係笑,我當真0架喇!」