靚仔又風流嘅林子祥兒子林德信（Alex），自從俾舊愛松岡李那狠撇後，有報道話分手唔夠3個月，Alex速食舊公司環球師妹Aga（江海迦）玩「AA戀」，佢哋為咗掩人耳目，約會都搵埋朋友做擋箭牌，結果造就Alex識到女友嘅巨胸閨蜜，點知Alex不改風流本性，竟然背住Aga偷約巨胸女，兩人喺月黑風高下浪漫行沙灘。

Alex先被影到同Aga去數碼港公園玩滑板，同行就有呢位巨胸女，由於當日有正印喺身邊，兩人玩避忌扮唔熟，Alex仲好識冧女友化身攝影師，用手機幫Aga影踩滑板嘅英姿；另一日，Alex就被影到撇甩女友，偷約巨胸女同幾位友人去淺水灣食飯，着deepV晒事業線嘅大胸女成副戰鬥格，兩人飯後孖住去行沙灘，趁黑麻麻之際，Alex輕掃女方秀髮，巨胸女就主動攬腰，兩人對住個海談心，浪漫到暈。

《蘋果》向兩人求證，Alex透過短訊回覆：「我們不是三人世界，是三人行，首映見！」乘機幫公司寰亞嘅新戲《三人行》賣廣告，呢部係杜琪峯執導嘅新戲，由古天樂、鍾漢良、趙薇拍攝，雖然Alex冇份演出，都藉緋聞幫公司新戲宣傳，認真識做。至於被指男友背住自己偷嗒閨蜜嘅Aga，0依家就熄咗手機玩人間蒸發，連唱片公司都搵佢唔到，唔知係咪受到太大刺激要匿埋呢！