今年日本馬在香港國際賽表現相當好，「三連冠」在香港一哩錦標贏得清脆利落，予人勁度十足的感覺，但論勁度，還是日經指數勝一籌，繼上周五大幅反彈220點後，昨日再勁升334點，收15738，是00年10月以來新高。
受日股急升帶動，期指好友進行大反撲，在開市前時段，期指裂口高開98點，升上14999，跟住極速抽高至15180。期指短短兩三分鐘內挾高279點，由上周五收市14901挾至15180，趙飛雲雖然冇揸到淡倉，但亦覺得十分震撼，心諗如果上個星期五手多多沽咗幾張期指……，結果未諗完已一股寒氣湧上心頭，唔敢再諗落去。

上落市　窩輪引伸波幅縮

港股近期大上大落，單日動輒上落一兩百點，看似非常波動，但甚少連續兩日大升或大跌，多數是單跳1日大升及1日大跌的走勢，所以能夠在相對狹窄的波動區14800-15200內上上落落，似是對沖基金在做嘢。
港股在上下高低僅400點的範圍內波動，揸正股問題不大，但揸窩輪就會面對引伸波幅逐漸收窄的問題，特別是一些引伸波幅偏高的窩輪，即使正股只係上上落落，但輪價會因收縮引伸波幅而輸錢。
倉內的恒地（012）停牌，據說與調高恒發（097）的私有化作價有關。恒地現水平風險不大，計及收取股息0.60元，現價實有2-3%進帳。恒地三角形走勢近尾聲，復牌若升破34.90元收市，加注買多5000股，升破三角形上試37元。
油價在亞洲市輕微反彈，但仍受制於60美元之下，倉內中海油（883）昨日股價無變動，平收5.55元，走勢和預期差不多，目標價和止蝕位維持不變。
趙飛雲