告東尼開季連叮兩日,總共輸咗廿駒,今日(21日)終於反敗為勝,不過大家未必諗到幫佢開齋嘅騎師係楊明綸,而唔係佢嘅得意門生蔡明紹。
開鑼日至傷癒復出之楊明綸,第五場四班千六米騎「尊兄」留衝一段,拉士100米大爆發,結果將三大熱門一舉殺晒,「常開心」、「狄奧圖」同「耀華盛甲」順序跑二至四名。楊明綸自3月30日勝出「開心凱旋」後,近半年內首度建功,新馬季咁快有馬贏,可喜可賀,難怪佢賽後表現得好興奮。
由馬會前副主席周湛燊擁有之「尊兄」,上季尾贏田草千八米開齋,今季初出即於同一跑道贏千六米,冧到呢位老牌馬主好開心!