豐田新款家庭七人迷你MPV視本田Mobilio為敵

蘋果日報 2002/05/29 08:00


近年本田一改佢哋嘅市場策略,以迷你車K-Car作主導,不僅市場有好嘅迴響,而銷售情況重穩步上揚,令一眾日本車廠無不刮目相看。其中,除咗Fit(即港版Jazz)響本土及香港成熱賣車款之外,另一款未有正式引入香港,但同樣以Fit嘅底盤開發,兼擁有七座位配搭嘅Mobilio響東瀛亦備受關注。而近期有消息傳出,話豐田同日產兩大車廠正計劃響明年推出同樣走家庭七人迷你MPV路線嘅新車,既有相近嘅兩廂式車體結構,亦有四周闊大車窗組合,而新車嘅體形跟同廠Spacio(即港版CorollaVerso)酷似,但卻擁有左右雙趟門組合,給乘客有易於上落嘅方便;至於引擎配搭,好大機會用上現行VVT-i嘅1.5及1.8公升型號,並配有軚自動波組合,以給車廂之間有Walk-through嘅方便嘛!