煲呔出「新」書《我會做好呢份工》搞簽名會，有廿幾個市民一早喺書店外排隊，霸頭位嗰位市民等咗個幾鐘，點知幫煲呔搞競選嘅李國寶、李民橋父子打尖，插隊攞簽名同影相。李氏父子大把機會見煲呔，隨時簽名都得，大紫荊勳賢都唔守規矩，成何體統？香港被稱「李家之城」，姓李嘅真係惡過人？八方都係姓李，不過冇特權。
簽名會約半粒鐘，煲呔簽咗80幾本書，有個陳伯乘機同煲呔遞請願信，佢批評政府新界房產政策混亂，雖然佢真金白銀買書先有呢個簽名機會，但因令煲呔尷尬，所以俾人趕走咗。煲呔心情冇受影響，有人讚佢普通話好，佢話聽鄧麗君同睇中央台學。書店老闆李頌欣話入貨600本，賣出約140本，遲啲會賣埋梁家傑本《有得揀，你至係老闆》。