大陸女星楊冪，噚日同劉愷威齊齊透過公司發出聲明，宣佈結束5年婚姻關係（新聞連結： https://bit.ly/2QLaVky ），佢哋兩個離婚，好多人都戥佢哋可惜。

楊冪同劉愷威近年聚少離多，屢傳婚變，早前更有大陸報道指劉愷威同大陸女星王鷗拍劇時疑出軌嘅新聞，竟然有一位楊冪fans喺2016年年頭開始，以「楊冪今天和劉愷威離婚了嗎」呢個名加入微博，最初只係轉發楊冪嘅微博，同埋講自己有幾鍾意楊冪。

不過舊年6月開始，佢就開始日日幫劉愷威同楊冪做離婚倒數，仲表示「待你離婚之日，就是我改名之時」，而且仲話「我相信你總有一天會看清那個沒有擔當，永遠躲在老婆後面，深更半夜對夜光劇本男的真面目」。

嗱，呢位忠誠fans幾乎日日堅持倒數，雖然曾經都有絕望過，但等足568日，終於畀佢等到佢心愛嘅楊冪同劉愷威離婚，佢除咗表示自己終於可以改名之外，仲開心到要搞抽獎慶祝，可見佢有幾咁唔睇好楊冪同劉愷威呢段婚姻。

精選娛聞，喺晒《娛果》
http://fb.com/appledailyent