金價近期愈升愈有，阿虎上周日逛街途經金行門口，望望個牌價，買入價（店舖收金價）是每両5020大元。
阿虎咁大個仔都係第一次見香港金價有5字頭，而且金行內外有唔少人在講金、買金及賣金，公公、婆婆、師奶和阿嬸圍住部股市報價機，阿虎就見得多，但金行俾散戶圍住，阿虎都係第一次見。
兩隻黃金股噚日持續上升，靈寶（3330）高見5.05元，最後升4.73%，收4.975元，紫金（2899）亦升3.2%，以全日高位4元收市。
華彩（8161）先以2億元收購跨國博彩系統和軟件解決方案供應商Octavian90%，跟住再以9.8億元代價收購視頻彩票終端機營運商Corich50%股權（若計埋優先股就只得33.3%），其中單是收購Corich所需的現金就高達5億元（餘額以新股支付）。
黑客話，華彩如此大手筆，反映公司有決心發展成為中國彩票業的資訊設備供應商。現時中國發行彩票及彩票營運只限於政府機構，外界只能參與相關的資訊科技及設備提供層面。華彩的發展策略務實，如果股民睇好中國彩票事業，華彩值得諗諗。
華彩噚日復牌，股價一度大升30%至4.10元，但高位有獲利回吐，收3.80元，升20.63%。大股東寶威（024）則倒跌2.27%至0.86元。華彩可能需要進一步集資，如果股價升得太高，高追的風險不小。