呢幾個星期好多香港社團排隊進京見領導,一班人上完又一班,八方有老友噚日喺港澳中心啱啱送完民建聯走,等緊港進聯到,就撞到好多意想不到嘅人。
首先係胡鴻烈帶隊嘅亞太法律協會,上嚟見領導傾CEPA。之後又見到中國殘疾人聯合會喺酒店食飯,行過去八吓,遇見好耐冇露面嘅鄧樸方(已故領導人鄧小平個仔)。
鄧樸方係中國殘聯主席,佢精神好好,身邊重有方敏生陪住一齊。原來呢兩日中國殘聯喺人民大會堂開第四屆代表大會,香港都有十七位復康界代表出席,除咗方敏生,重有林鄭月娥同鄔維庸醫生㖭。
林太同鄔醫生噚晚重諗住去朱幼麟喺北京嘅四合院參觀,八方老友都未趕得切去湊熱鬧,港進聯大軍又殺到,今次見到嘅人重出乎意料,林建岳竟然着住T恤風褸出現,乜岳少都係港進聯成員咩?佢話自己都係啱啱先知喎!
傳真︰2623-9278
電郵︰
[email protected]