立法會上週改選內會同財委會正副主席，全數由建制派獨攬。獲建制派委以重任、喺呢個立法年度接替吳亮星做財委會主席嘅保險界陳健波，近年議會發言都幾有火，但佢今日接受電台訪問時強調，做議員同主席會有唔同處理手法，一如球員同球證之別，球員目標係入波、但身任財委會球證嘅自己，就力求公平公正。但佢講明此舉唔等於做「鵪鶉」，如果先禮後兵兼忍讓後，泛民仲繼續挑釁，佢會還擊喎。

陳健波會喺本周五財委會召開前，出席泛民會議聽意見；由於政府已經要求安排12節會議處理創科局嘅申請，佢亦特別同商經局局長蘇錦樑會面，叮囑官員聚焦回應泛民提問；如果泛民唔拉布，佢有信心創科局撥款喺10月通過，強調如果要剪布，事前會同議員商討。