今年38歲嘅無綫小生陳智燊同31歲華姐出身嘅宋熙年，佢哋今日喺英國已經結咗婚喇！

一對新人雖然喺英國結婚，除咗着西式「英倫風」禮服，佢哋亦依足中國傳統，着上中式裙褂、撐紅傘，兩人臉上都流露出幸福嘅笑容。

今次兄弟姊妹團分別有祖藍夫婦、高海寧、楊明、龔嘉欣及陳爽等，相中一眾姊妹身穿銀色長裙，「銀光閃閃」嘅佢哋每人都拎住幾封大利是，笑晒口咁樣，睇嚟今次個婚禮眾人都玩得好開心！

當中最經典就一定要數龔嘉欣由姊妹變「兄弟」，佢着上棕色西裝打埋呔，個樣仲有啲「招積」，不過相信佢心入面都好戥一對新人高興嘅！