台灣嘅32E童顏巨乳郭書瑤（瑤瑤）噚日去到澳門威尼斯人，為今日舉行嘅bma同種子音樂合作嘅全新品牌bmaseed大型音樂會綵排，到時佢會同韓國組合F.Cuz又唱又跳，當然唔少得唱出佢為人熟悉嘅作品《愛的抱抱》，不過冇見瑤瑤一排，見佢塊面長咗下巴尖咗，馮仁昭反而覺得佢肥肥哋仲可愛。
第一次去到澳門嘅瑤瑤表現得好興奮，見到工作人員已經第一時間話表演完後要出去試澳門出名嘅美食，好似豬扒包、葡撻、燒乳豬等，原來瑤瑤呢幾日只係食菜同幾塊肉，因為佢想以最佳狀態見人所以食少啲，餓咗一輪唔怪得佢咁想嘆澳門美食啦。
除咗美食之外，今年19歲嘅瑤瑤仲想去賭場玩兩手，佢計劃綵排完落咗妝後同助手一齊去碰吓運氣，由於佢唔識賭，所以只會玩老虎機。另外瑤瑤今次以師姐身份帶埋有「台大G奶」之稱嘅師妹楊伊湄一齊去澳門同大家見面，實行以身材一較高下。

曹格俾華仔鬧醒

另外，bma老闆羅傑承噚日接受商台電話訪問，佢話已經集資咗四億發展音樂同電影，電影方面會一年開4至5套戲，嚟緊會有一套《老夫子》動畫，而且仲搵咗導演譚家明幫佢寫劇本。
至於今次一齊到澳門嘅曹格，早排接受台灣傳媒嘅訪問，佢透露當日同側田喺街頭打交事件後，有一日喺機場等機時，睇到有報道話佢曾經攞刀對住老婆，又話囝囝發燒入院，當時嘅佢全身打冷震仲喊到成面濕晒，結果佢被劉德華一句話點醒，曹格話：「他說這對我是好的，如果經過這次還不改變，那就收工吧！」曹格話今年開始至今一滴酒都未飲過。