當年今日
關於我們

【短片】【致敬變抽水?】「表達啱嘅嘢」唔應該受抨擊 森美反插唔係好現象

蘋果日報 2016/06/27 06:00

蘋果森美香港何韻詩黃耀明白色恐怖「#向前線消防員致敬」

九龍灣時昌迷你倉四級大火,燒足108小時終於喺上周六深夜撲滅,呢場無情大火令2名消防員不幸殉職。

事件發生後,查實坊間已經有唔少人自發去出一分力去支持呢班消防員,演藝界喺周六先呼籲藝人、市民用白紙寫「#向前線消防員致敬」打tag自拍上載到facebook;同時又邀請過百個歌手及藝人,合唱《真的英雄》,為前線消防員表達敬意。

有網民卻批評此舉有「抽水」之嫌,質問點解何韻詩畀Lancome杯葛、林榮基事件又冇有藝人企出嚟支持?黃耀明、杜汶澤畀大陸封殺,又唔見佢哋出聲?不過,另一批網民則反駁向消防員致敬是毫無疑問的事。

森美前晚喺fb亦有上載自拍片,結果俾網民群插,有人仲話見到佢呢張相,覺得好失望。

今朝早森美為咗呢件事喺節目《早霸王》開咪講咗近一個鐘,事後佢接受《蘋果》訪問時,佢話唔係勞氣,只係覺得唔止藝人,任何人想對消防員致敬呢個都係合適嘅時間。

對於今次事件有人批評藝人「抽水」,森美力撐演藝界話:「呢個絕對係一件啱嘅事,我覺得最重要將正確觀念帶畀市民,如果有覺得啱嘅嘢都唔敢講,係一個白色恐怖,將來乜都自我審查,會影響到政治理念,民生課題都唔敢開聲,都唔係一個好嘅現象。!」

森美仲話:「表達一啲絕對啱嘅嘢唔應該畀人評擊,除非評擊人嘅人係別有用心。不過,我今朝講完都覺得網民冇乜大改變,支持繼續支持,唔支持就更加唔鍾意,但都冇辦法,盡做!」