當年今日
關於我們

精武風雲 強聲弱音 7.1出晒

蘋果日報 2010/11/21 00:00


李小龍返咗嚟?錯!佢唔係A貨李治廷,更唔係鋼門陳國坤,講緊係今個禮拜嘅主角甄子丹。硬橋硬馬真功夫、模仿李小龍截拳道、群毆時哇哇大叫!更正係呢隻BD支援7.1環迴立體聲,拳腳虎虎生風,雙截棍勢猛力沉,隱隱中我好似中咗兩棍!

記者:陳國輝
講古仔:日本仔殺到嚟!
呢期中日題材熱爆,《精》以日本侵華作背景。夜總會老闆劉爺,賭枱上認識來自法國嘅齊天元(甄子丹飾),原來佢竟然係七年前擊敗日本武術高手後,中槍逃走嘅陳真;陳混入夜總會,化身黑俠,暗中粉碎日本仔嘅刺殺行動,保家衞國!
empty
夜上海聲畫Sharp
港產片甚少用50GBBD,呢次《精武風雲.陳真》令大家再見識到!咁大容量用喺邊?不妨從畫面仔細觀察,夜上海背景,懷舊建築、昏暗街道、霓虹燈影,如果想做得似,Details唔少得;但若然製作馬虎,高清就會變成穿崩位。呢隻碟有大量昏暗場景,但黑位雜訊甚少,好似黑俠嗰件黑衫,大家更可清楚見到質地;另外值得留意,係夜總會內燈光效果,如果電視夠靚仔,應可呈現當年感覺。
音色主要體現於武打,拳來腳往固然必備,但開場嗰十幾分鐘槍戰,除咗步槍更有炸彈,用嚟試低頻或者方向性絕對適合;但我更鍾意陳真最後被o架仔包圍嗰幕,細心留意,你會聽到微弱嘅雙截棍音效;唯一可惜,配音有少許不夾口形,希望下次有改善。
empty
■夜上海嘅感覺,完全可體驗到。
empty
■余文樂飾演一名軍閥,但戲份唔多。
必試7.1場口
爆炸槍戰
套戲一開波,馬上進入槍戰場面!除咗會不停有爆炸聲,仲有來自四面八方嘅槍聲,用來試低頻同音效定位最啱。
empty
雨中比試
余文樂飾軍閥,離開飯店時被日本仔暗殺;陳真為保護政要,不惜同多名殺手較量,雨聲夾雜拳腳效果,音感豐富。
empty
百人大戰
最後決戰!陳真踢館以一敵百,除普通打鬥聲,如果個AMP夠靚,仲會聽到雙截棍微弱嘅鐵鏈聲,專試微細位!
empty
Bonus睇刪剪位
劇情唔多講,各位買返去睇就知;不過Bonus就有少少失望!來來去去嗰幾樣:預告片、刪剪片段、導演及演員專訪。
empty
■特別收錄劉偉強專訪,對內容唔明白可睇埋呢部份。
Profile
類型:Blu-ray50GB
畫面:2.35:1
音效:DolbyTrueHD7.1、DolbyDigital5.1
特別收錄:預告片、製作花絮、刪剪片段
empty
$198(BD)
$99(DVD)