當年今日

阿Sa買漾日居 大孖心癢難耐
阿嬌貝沙灣睇樓貴賓駕到

蘋果日報 2003/05/07 00:00


Twins入行兩年已名利雙收,兩位成員成為千萬小富婆,繼早前蔡卓妍以七百八十萬購下漾日居單位後,昨日鍾欣桐亦前往位於薄扶林的貝沙灣睇樓,更被稱呼為「貴賓」。不過被傳媒發現行蹤後,她即放棄睇樓兼飛奔英皇求救。
英皇人氣組合Twins入行日子雖淺,但蔡卓妍(阿Sa)及鍾欣桐(阿嬌)卻名利雙收,去年Twins成為英皇金蛋,兩人早已晉身千萬小富婆行列,難怪繼阿Sa榮升業主後,阿嬌亦有意買樓置業。
早前阿Sa搬離海怡半島,並以七百八十萬購下漾日居一複式單位,而阿嬌現時居於司徒拔道東山台,月租約三萬五千元,不過其寓所附近常有fans聚集,故一直計劃置業的阿嬌便心癢癢,近期開始四出睇樓。本報昨日便得悉阿嬌前往位於港島薄扶林的貝沙灣睇樓,參觀示範單位。

飛奔跑入大堂
昨午十二時許,阿嬌乘坐保母車抵達貝沙灣,負責接待的工作人員見狀即向對講機說:「貴賓嚟啦!」身穿便服及戴上口罩的阿嬌與助手落車後,聞風而至的傳媒即爭相拍照,阿嬌連忙邊講電話邊飛奔跑入大堂,她還說:「咁多記者㗎?有成十幾個呀。」
由於行蹤曝光,阿嬌惟有放棄參觀單位,她講完電話後,突然急步走向門口,登上保母車離去,臨走前被問到是否前來睇樓時,阿嬌即發嬌嗔說:「唔睇啦!」之後保母車直駛位於灣仔的英皇,阿嬌更跑上唱片公司求救。
事後記者致電阿嬌的經理人霍紋希,她在電話中說:「阿嬌係想買樓,佢覺得貝沙灣環境好,但佢今日估唔到有咁多記者喺度,所以都冇睇到,佢驚混亂會阻住人哋。」據悉阿嬌有意在港島半山區置業,首要條件是環境清靜及保安嚴密。

Yumiko中環睇樓
此外,英皇3T之一的鄭希怡(Yumiko)目前正居於成和坊,據地產界消息指出,Yumiko上周曾在銅鑼灣及中環睇樓,但她只是租樓,要待儲夠錢後才可圓置業夢。
採訪:朱芷瑩
攝影:何國豪
empty
阿嬌行蹤被揭,竟放棄睇樓迅速離場。
empty
阿嬌
又會有咁多記者㗎!
empty
阿嬌其後折返唱片公司撇甩傳媒。
empty
Yumiko上周曾秘密到銅鑼灣及中環物色新居。 資料圖片