回歸20年，黑膠碟同CD都成變歷史冇咩人會買實體碟，好多人都轉用網上平台聽歌，而今年憑《救殭清道夫》主題曲《長相廝守》喺YouTube有逾340萬點擊爆出嘅獨立樂隊ToNick，雖然背後冇大唱片公司支持，但靠自己喺網上吸納歌迷，終於成功唱出一條血路。

當年Beyond主音黃家駒話講過「香港沒有樂壇，只有娛樂圈」，咁身為後輩嘅ToNick又點睇回歸後嘅樂壇呢？主音恆仔話：「以前可能全香港人都係聽嗰首歌或者嗰位歌手，但o依家喺網上聽到首歌好鍾意就會share。」低音結他手Ryan就話：「我覺得題材多元化咗，嗰時係好多情歌，但o依家其實有好多其他題材。」結他手小龜就指o依家有好多新樂隊，好似雞蛋蒸肉餅、小紅帽：「佢哋都係非常好嘅年青樂隊，可能觀眾未必聽過，所以冇話主流唔主流。」

小龜又講到，即使少咗人買碟，但作為樂隊最希望係觀眾睇live演出：「大家都知道o依家賣唱片，唔似97嗰陣咁容易搵到生計，事實上太多網上串流平台，但對我哋都係好嘅，因為多咗機會接觸其他國家嘅音樂。不過作為音樂人嚟講，如果想支持我哋，除咗網上平台聽我哋嘅歌，唔該入場睇live騷，呢個係新世代轉變，大家唔好再坐喺屋企對住電腦，出嚟睇多啲live騷，都會識多啲朋友。」

問到佢哋幾耐冇買唱片？小龜表示：「我會幫襯iTunes，最近買咗香港結他手Jason Kui嘅《Absense of Words》，佢唔使用言語，齋用音樂表達；而且佢係香港人，雖然冇廣東話，但都係香港歌曲，值得支持。所以好怕聽到『香港樂壇已死』、『青黃不接』，其實係你冇留意，當然我哋都會虛心學習做好啲。」鼓手晨曦則表示：「我覺得以前要成就一個歌手或樂隊係好難，但o依家樂手會自己拍片擺上網，表現才能俾全世界人睇，用唔同方法緊接上一個年代。」