噚日恒指創收市新高，股市氣氛表面上大旺，惟若然手上揸住嘅係細價股，噚日似大跌市多過升市。股仔之所以急跌，市場流傳多個版本，其中一個同窩輪商有關，不過話明係傳聞，是否屬實好難證實。
事實上，市場資金本來炒嚟炒去都係嗰注錢，早排大市橫行，當然係炒啲唔多跟大市嘅細價股，𠵱家輪到中資大股炒上，梗係沽細價股買大價股。另一方面，細價股近期連啲最劣質嘅都炒咗上去，大部份已極度超買，水位有限之下炒家沽貨離場好正常。
日前講過減排節能係國策，噚日睇嚟得隻香港建設（190）有力上升，其他嘅受股仔氣氛惡劣所影響，沽壓頗為沉重。正路環保股，本來應數中糧控股（606），因乙醇呢種生物燃料，全世界都正大搞，中國無理由完全唔做。可惜中國更大問題唔在於燃料而在十多億人口嘅糧食，用粟米搞乙醇，搞到飼料價同豬肉價飛升，變咗唔係國策受惠股。

前景毋須過份看淡

中糧日前宣佈與徐州市政府訂立協議，擬興建一個非糧作物（甘薯）乙醇新項目，年產量達10萬公噸。呢個消息如果喺上個月公佈，好可能已經令到中糧股價急升，但係噚日消息卻令中糧跌咗2.8%。其實乙醇作為燃料氧化劑，當乙醇與汽油混合後，能令燃料更徹底燃燒，大幅減少汽車排放物及二氧化碳，而現時國際正合力減排解決溫室效應，中糧前景未必真係咁差，可以等芬佬沽完貨，破埋底再撈。