老實講我都想好似我啲朋友嘅幻想咁可以睇咗張相就決定去邊度拍戲，又或者係唔知點解，總之揀個想去旅行嘅地方去拍套戲啦。我做副導演嘅時候真係見過有人打開個世界地圖，指着一個國家：「呢度我未去過，就去呢度拍戲啦。」咁當然呢個係個有力人士啦，不過真係幾搞笑，如果係拍寰宇風情呢類型節目我就明，但係𠵱家係拍電影喎，唔係應該按故事需要選擇適當地點去拍攝咩？除非佢當自己拍緊嗰部戲叫寰宇風情啦。
我覺得自己好幸運，經常可以去一啲旅行一定唔會去嘅地方，了解唔同人嘅生活，不過唔係次次都咁好玩，例如係我𠵱家喺一個零下十度嘅地方睇緊外景，要睇多五日至可以返屋企。