2003年，有一日，鬼塚嘅家庭醫生，講咗一句說話，改變咗佢嘅一生。

醫生指住份驗身報告，對鬼塚話：「一係等死，一係減肥」，一夜之間鬼塚將所有做緊生意嘅時裝店執晒，由近200磅減到o依家148磅，每日堅持抽兩、三個鐘去做運動。

【「摸下個袋，夠使，拉閘」】
「03年我有痛風症，醫生同我講，鬼哥，你190幾磅，報告全部肥佬，兩條路，一係等死，一係減肥。我二話不說，摸下個袋，一路使落去都夠，拉閘。

「由嗰日開始，我就開始做運動。全部鋪頭結束，連埋內地廿幾間鋪頭，鬼塚時裝，成個系列，就喺一夜之間諗通咗，唔諗通係好難放低，當時我尿酸一個月，要去兩次醫院打針，所以嗰個陳醫生話得兩條路，叫我自己諗。」

生死之間，其實冇得揀。但係呢個重大決定，對鬼塚影響深遠：「醫生話得兩條路，我減肥，自己諗冇人幫到你，當年我條尾龍骨，坐唔到咁耐，係要慢慢扶起身。大家真係要拎少少時間出來做番運動，一定要做，唔理你做咩生意，唔相信時間咁忙，一定係籍口，運動係必需要做，堅持。

「嗰時我192磅，o依家最肥去到152磅，我o依家係成日係咁食，點解要咁！對自己承諾，對自己嘅健康，酒繼續飲，繼續食，狂飲狂食。」

【瘦到肚皮撻咗落籮柚】
所謂欲速則不達，減肥係要有方法，鬼塚亦曾經失敗過：「我係用咗5至6年時間減。肚腩好大，當時係42吋腰，即刻收喺嗰塊皮，好似波冇氣咁，撻咗落嚟。

「我曾經減到去138磅，塊肚皮撻咗落個籮柚度，我以為自己有兩個籮柚，其實係啲皮，好得人驚呀！點算呢！同老婆商量，跟住食番肥少少，慢慢再減。其實兩年可以即刻減到，但係嗰時又怕凍，又成日傷風，成日好唔掂，你咁樣做法，係得兩條路，一係死，一係食番肥啲。

「妖！成日得兩條路，唔好玩喇！減咗又話唔得，食肥又話唔得，中醫叫我食番肥少少，o依家63歲，你見我成日搞個耳仔，我左邊聾咗，60歲突然間聾咗，整咗三年，冇，話我60歲開始退化。」