無綫劇集《法證先鋒》收視理想，劇中四位男女主角歐陽震華、林文龍、蒙嘉慧、鍾嘉欣夾錢「萬歲」筵開七席，並專程請來高層樂易玲、曾勵珍、監製梅小菁，還有一班幕前幕後的工作人員，又有龍蝦，又食魚翅，每人盛惠五位數字。

解釋即是掩飾

本來四位主角大排筵席，理應成為主角，尤其鍾嘉欣一襲吊帶紅衣，大騷香肩，豈料最後被遲到大半句鐘的郭少芸成功搶鏡。姍姍來遲的她，打算偷偷混入人叢當中，最後事敗，被司儀王賢誌（Vinci）踢爆遲大到，珍姐在大合照時，忍不住寸郭少芸說：「做法醫係咪要準時？」郭少芸眾目睽睽被珍姐教訓，即刻躲在林文龍背後遮醜，之後，梅小菁又加一句說：「所以佢咪做法醫助手囉！」
事後，郭少芸被追問「做法醫係咪要準時？」她即時一臉尷尬，說：「今朝趕住剪呢個新髮型先遲到，係我唔啱，我都係想畀個新髮型大家睇，如果今日司儀唔係Vinci，就冇人知我遲到，算啦！解釋即係掩飾。」
採訪：楊潔雯　
攝影：陳順禎