人妻裕美婚後好少亮相，原本佢近日將工作移師內地同馬來西亞，今早佢應SmarkBTV邀請，同3位小童星合作，喺灣仔林寶堅尼陳列室拍攝節目，但竟然係由3位小朋友去介紹名車，裕美只係從旁協助教導小朋友。

3位小朋友分別係黃雪兒（維多C妹妹）、EliseC.、譚亦俊（Hanson），雖然佢哋只得5至6歲，但拍攝經驗十足，記對白唔輸蝕畀成年人，今次仲要係講解有關汽車介紹，裕美見到都激讚佢哋叻叻豬，仲話自己好似呢班小朋友年紀時，好似一嚿雲咁。

裕美見到小朋友咁精靈活潑心郁郁想生B，希望同小朋友合作多啲可以實習未來，接觸小朋友較多後，認為身教好重要，所以同老公有共識，裕美話：「預計3年後先生小朋友，生咗想完全擺晒自己時間去湊，所以0依家趁後生，同老公享受二人世界先，我同老公都鍾意生女，我老公一定會錫都不得了，異性相吸係冇得改變。」