呢日三T尾兩關各有特色，次關第五場開全熱門，尾關第六場二班千六米，全場評分最高1至4號馬包辦四重彩，每注派11,632元。
當中蘇廐3號馬「勝飛」夥拍李寶利後發先至，末段從馬林中殺出重圍，落飛次熱門捧走今屆評馬協進會盃，至於方廐1號馬「旅遊大哥」影相力壓摩廐4號馬「共創美夢」獲亞軍，郭能繼第五場「招財快駒」，連搏兩場都做二奶，「共創美夢」14檔出閘姍姍來遲只得第三，三T每注派183萬。此場第四名至係大熱門葉廐2號馬「聰敏不凡」，此駒增程初跑千六米落敗，跨季四連捷後斷纜。
蘇保羅連埋第二、三場贏「北非諜影」同「奪目商人」，呢日跑完三T已經食出大三元，季內頭馬升到剛好30場，當中有19場於2015年攞到，旺到黐肺。「勝飛」贏馬後，個子細小的李寶利，用頭頂住極之巨大的獎盃，並做出十分辛苦的表情，場面有趣。
蘇保羅氣勢如虹，他指賽前曾仔細研究「勝飛」的形勢，預計步速偏快，因此吩咐李寶利採取留前鬥後的戰略，結果戰略成功，馬兒末段衝刺力極強，估計加分後仍具競爭力。