現時喺韓國收費台tvN熱播嘅韓劇《機智牢房生活》上月22號首播，無論口碑同收視都好好，喺前日播出嘅第6集，仲創5.847%收視新高。

劇集以監獄為背景，講述一眾囚犯同獄警之間嘅故事，唔係單純談情說愛嘅韓劇，所以吸引另一批觀眾支持，當中朴海秀飾演嘅知名棒球手，因為暴打涉嫌強姦佢妹妹嘅犯人，令佢由天堂跌至地獄，仲被判坐監，而朴海秀喺獄中就憑佢嘅小智慧生存，相當有趣味。

不過現實生活中，朴海秀就慘受情傷，根據今日韓國傳媒報道，朴海秀同音樂劇演員任江熙分手，兩人拍拖約三年，但因為各有各忙，令到二人甚少時間見面，好自然就咁疏遠。而受到情傷嘅朴海秀喺分手嘅傷痛中就繼續拍攝《機智》，喺劇中朴海秀同樣與Krystal分手。

分手消息傳出後，雙方所屬嘅事務所就指兩人已於去年年底分手。

更多韓流，喺晒《娛果》
http://fb.com/appledailyent