許志安、蔣志光、韋綺姍及麥玲玲,今日現身跑馬地馬場,宣傳年初三新春賽馬日活動。
大會安排四人合照時,麥玲玲鬼馬將手上嘅「丁財兩旺」揮春交給安仔,但安仔堅持不接,場面搞笑。
安仔接受訪問時,麥玲玲咁啱喺後面受訪,佢就趁機對安仔話:「生BB啦!生BB啦!」安仔笑謂:「添丁呢啲留返畀師傅,揮春要睇清楚,唔可以亂接。」
問到農曆新年將至,十嫂(鄭秀文)會唔會幫佢買紅底褲過年?安仔笑言要親力親為。至於點樣同十嫂過農曆年?安仔話:「負責煎糕囉,又睇《嚦咕嚦咕新年財》,年年都睇好似恐怖片,年年都劉德華同古天樂。」
佢又話會同十嫂睇新戲《衝上雲霄》:「要買套飛機師衫,年初一喺屋企着先。」