今年26歲嘅蔡思貝，出道以嚟，都搣唔甩「高分貝」呢個花名，事關佢拍親嘅劇，獨有雞仔聲再加擘盡喉嚨嚟講對白，既吵耳又煩膠。喺新劇《踩過界》中，除咗把聲挑戰觀眾聽覺，最慘連個哨牙造型都唔多討好，以往只需較細聲量，仲可以勉強撐下去，今次唔少觀眾直情話要熄機慳電費。

雖然觀眾緣一般，不過男人緣就非一般。Watt數十足嘅蔡思貝，除咗同《狂舞派》舞蹈總監麥秋成拍拖外，仲先後同周志文、張振朗、洪永城傳緋聞。舊年8月，有周刊仲影到蔡思貝趁麥秋成去北京公幹嗰陣，深夜上咗圈中食家周志文喺藍田嘅公屋過夜，孤男寡女喺斗室共處18粒鐘…(新聞連結： http://bit.ly/2h0Kjq3 )。事後麥秋成要喺Ig留言話：「唔想俾人浪費兩次嘅時間！」(新聞連結： http://bit.ly/2h9bIJ6 )似有弦外之音。

前度決絕斬纜，分手後，蔡思貝同麥秋成各自各精采，男嘅喺今年2月尾，就同個新歡索女孖住去睇Dragonland音樂節。其實同一晚，喺同一片天空下，蔡思貝原來都同個男仔喺VIP貴賓房，打得火熱。《蘋果》收到消息，蔡思貝呢位新歡，就係黃淑儀個仔徐肇平。

據當晚目擊人士透露，蔡思貝同張曦雯、劉佩玥等無綫女藝人一齊入場，大會安排眾人到VIP房睇騷，不過個騷開始冇耐，就有人見到蔡思貝同徐肇平攬腰黐實咬耳仔。「其實嗰晚都有好多人喺間房入面，不過因為佢哋好大動作，所以唔少人留意佢哋。傾傾吓，Shaopin(徐肇平英文名)隻手仲後箍實思貝條頸，個頭就貼住佢塊面，蔡思貝就笑住同佢傾偈，個樣好受落咁，明眼人都覺得佢哋似係熱戀緊。」睇翻資料，其實早喺舊年年中，蔡思貝拍《純屬意外》時，因徐肇平探女方班而傳出緋聞。(新聞連結： http://bit.ly/2sWDY5o )1年過後，原來二人已經昇華到戀人階段。

其實5月尾，蔡思貝被指係第三者，捲入洪永城同唐詩詠之間嗰陣，一直將感情低調處理嘅麥秋成，忽然喺Ig貼出佢搭住蔡思貝膊頭嘅合照，而嗰晚係麥秋成擔任編舞嘅舞台劇《炫舞場2.0》尾場，蔡思貝專登去撐場。就係因為呢張相，外界以為蔡思貝同麥秋成成功翻撻。(新聞連結： http://bit.ly/2ti0HMn )但佢哋身邊朋友，其實早已得悉二人各行各路。

而同麥秋成拍拖期間，蔡思貝一直住喺男方位於西貢五塊田村屋，有指上年年尾二人分手時，女方遲遲未肯搬出，直至近日，撻着新歡徐肇平嘅蔡思貝，終於執包袱走人。《蘋果》噚日致電麥秋成，問到佢同蔡思貝嘅關係，麥秋成就話：「其實感情嘢，我真係冇乜嘢可以答到你哋。」問到蔡思貝仲喺愛巢住抑或已經搬走，麥秋成遲疑咗一陣就答：「我只可以講，我自己一個人住，冇同任何人住，其他私人嘢唔講。」