50歲嘅鄧兆尊，入行多年，最多人講嘅當然佢嘅感情史，同時間周旋喺「3C女友」Carmen、前助手車厘子與及Claire之間，當然有人妒忌，亦有人不屑，不過感情呢樣嘢往往係最難解釋嘅事，只要當事人認同，旁人亦唔駛太肉緊！

講到「3C女友」女友之中，前助手車厘子同兆尊呢段感情，當年有傳兆尊同安德尊齊齊爭奪車厘子，但最終係兆尊成功抱得美人歸，難得多年後嘅兆尊接受訪問，梗係追問佢講當年！

兆尊話：「呢個係一個好好嘅笑話，呢個世界上有嘢叫橋唔怕舊，最緊要受，係冇爭過，只係女追男啫，嗰陣我冇諗過同呢個人一齊，係因為一啲舊橋，智者必有一失，當時係喺訪問見過，順便幫我接埋job之類，總之係一個笑話！」佢仲否認同安德尊不和：「咁佢唔鍾意個女仔，點會有磨擦？嗰陣佢(車厘子)唔想同佢一齊做嘢，佢哋亦都冇拍過拖，安德尊嗰個靚女女友一早喺度喇，只係大家唔知啫，安德尊亦都唔係一個鍾意解釋嘅人。」

其實當年亦都有傳兆尊同行姐(陳彥行)拍過拖，兆尊話：「傳啫，佢咁索，嗰陣因為拍《皆大歡喜》，公司話呢個組合出嚟係效果幾好，搞到啲人誤會到，試過去《歡樂今宵》，俾阿姐同肥姐分別捉咗入房，好緊張咁『盤』我係咪同佢拍拖，因為佢哋都好錫我哋，後來知道我哋原來唔係，又問我哋點解唔拍呀？嗰陣我身邊已經有人，唔可以話靚就乜嘢㗎嘛。我唔係呢啲人！」

查實唔止阿姐同肥姐誤會，兆尊仲話：「嗰陣試過有個高層打俾我，話我女朋友今日生日，叫我即刻去過，去到見到行姐、佢媽咪同家姐，佢媽咪仲由頭望到我落腳，我當時好似俾人擺上枱，仲諗唔通因為呢套劇想撮合我哋？但係嗰陣有苦自己知，唔好糟塌佢，梗係借啲意耍退佢，搞到行姐好嬲。」

場地提供：名廚